国家打吡战绩拉锯
　　周六晚上西甲爆发第245场「国家打吡」，巴塞隆拿喺主场火併死敌皇家马德里。巴塞队长美斯今季要肩负更多前场逼抢任务，入球数字显着下滑，而皇马喺联赛踢法保守，令箭头宾施马经常孤军作战，而且双方平均年龄愈嚟愈大，体力消耗多，加上近年「国家打吡」唔旺入波，预计今场都係紧张而未必多波入，宁捧2.5球入球细。

　　如果计埋联赛、盃赛、欧联以至友赛，今次係史上第245场西甲「国家打吡」，双方各胜96场，打和52次，绝对势均力敌；假如单计联赛碰头，皇马以73胜26和72负稍稍佔先。

　　巴塞改由名宿朗奴高文执教后，更加注重攻守平衡；虽然仍以美斯担当进攻核心，仲有菲腊比古天奴、安素法迪及基沙文后上支援，但同以往只係斋做进攻唔同，依家要做埋前场逼抢，对于33岁嘅美斯嚟讲，体力要求高咗好多，所以佢今季4场联赛只係靠12码入过1球，而且未有助攻。

　　近5次交手仅8个入波
　　皇马上季联赛能后上封王，全靠稳守突击，经常1球起、2球止锁定胜局，今季未有增兵下，主帅施丹沿用呢套战术，头5轮仅入6球，虽然上场欧联对萨克达攻入2球，都要输2比3，联赛更爆大冷不敌升班球队卡迪斯，堪称奇耻大辱。过于保守嘅打法，令箭头宾施马孤立无援，头5轮只入1球，攻力大减，幸好中坚沙治奥拉莫斯今场应可赶及复出，有助巩固防线。

　　同昔日「国家打吡」斗攻格局唔同，近年双方都以先求不败为大前提，踢得相当保守，连盃赛在内，两军近5次交手合共只入过8球，美斯喺呢5战全部食白果，其中4场开2球或以下，今仗更係疫情影响下嘅压缩球季举行，预计入波唔会多。