欧联E组重头戏，车路士主场斗西维尔，两队分别係对上两届欧霸盃盟主，计实力及欧战经验本应不相伯仲，不过车仔近7次喺史丹福桥出战欧联只赢1次，而且今季大换血后仲未踢出队形，后防又甩甩漏漏，对住英超剋星西维尔让唔起对手，波童捧让球客胜。

　　车仔主场冇甜头
　　车路士係2018/19球季欧霸盃盟主，上季由林柏特领军出战欧联16强出局，4场欧联主场仅得1胜，如连同对上一次喺2017/18球季亮相欧联，车路士近7场欧联主场只得1胜4和2负，包括3次主场斗西甲兵未赢过，主场完全冇优势可言。

　　车路士今季阵容变动大，迪姆华拿、夏维斯、薛耶治等新兵质素毋庸置疑，不过暂时未能产生太大化学作用，而且后防始终係死穴，好似上场联赛主场对修咸顿，车仔就喺大好形势下被逼和3比3，无论用葛特苏马、安达斯基斯坦臣或堤亚高施华扼守中路都畀唔到人信心，门将阿列沙巴拿加、韦利卡巴尼路亦水准飘忽，新加盟嘅艾度亚文迪又有伤在身，前线入波随时唔够后防输。

　　西维尔上季喺前西班牙国家队主帅卢比迪古带领下，历史性第6次赢得欧霸盃冠军，夺标之路更先后杀败狼队及曼联，计埋佢哋2017/18球季欧联对利物浦及曼联，西维尔近6次欧洲赛对英超代表攞到3胜3和。西维尔踢法向来讲求整体性，甚少因一、两名球员缺阵或离队致水准大跌，面对现时欠缺队形嘅车仔有优势，让球客胜博得过。