聽朝美職東岸對決，費城聯主場迎戰蒙特利爾沖擊。費城聯今季攻守兼備，成為戰績冒昇嘅關鍵，而且專靠主場搵食，撞正由法國名宿亨利揸旗、踢法有前冇後嘅沖擊，實食冇黐牙，主勝有計。

　　費城聯陣中冇乜球星，但勝在整體戰出色，依家無論喺東岸同總排名，都位居次席，僅次於FC多倫多，關鍵係做到攻守兼備。費城聯今季聯賽暫時入咗28粒，攻擊點夠曬分散，冇話倚賴邊個數胡，派斯比高、沙治奧山度士、安東尼方坦拿、班頓艾朗臣輪流發威，令對手難於防范，更重要係防守夠硬淨，至今只係失咗13粒，係其中1支失波第2少嘅球隊，加上佢哋今季6次主場全部贏曬，係聯賽唯一主場全勝球隊，極具威力。

　　亨利教波唔識守

　　暫時喺東岸排第8嘅蒙特利爾沖擊，今季喺法國名宿亨利接手下，繼續踢性感足球，單睇佢哋入24球、失30球嘅數字，就知班波幾有娛樂性喇，可惜掛住進攻無助戰績，近6仗聯賽只得1勝1和4負。加上雙方近4次碰頭，費城聯贏咗3場，今仗有埋主場之利，再贏沖擊冇難度。