今晚除英超外，仲有場意甲獨腳戲，由博洛尼亞主場對帕爾馬。兩隊聯賽開咧戰同樣以0比2輸波，今場碰頭可以話係「海軍斗水兵」。事實上，雙方過去對賽往績亦屬五五波，近6次聯賽交鋒有5次打和，博洛尼亞冇本錢讓波，寧捧受讓嘅帕爾馬讓球客勝。

　　博洛尼亞上場作客淨吞ＡＣ米蘭兩蛋，更麻煩係荷蘭後衞米素爾迪積斯被逐，今場停賽令球隊雪上加霜，另一防守主力加利美度雖坐完越季波監復出，但狀態始終存疑。進攻方面，主力射手柯蘇連尼就仲未操起狀態，上場踢咗57分鍾已被換走，若然呢位意大利國腳未能及時重拾射門鞋，恐怕博洛尼亞難以攻破帕爾馬大門。

　　作客嘅帕爾馬今季請嚟44歲少帥利華蘭尼執教，佢哋上場對拿玻里踢至中後段先失守，球員斗志唔曳。再睇埋兩隊近6次交手，居然出現5次和波，包括上季兩循環交鋒，都係打成2比2平手。由於帕爾馬前鋒謝雲奴、門將哥隆比都有啲傷，今場唔排除更著重防守，絕對有力搶分而回，受讓抵玩。