上屆亞軍捲土重來
　　今晚歐國聯A1首輪大戰，上屆亞軍荷蘭主場火併波蘭。荷蘭坐擁華基爾雲迪積克、迪比及曼聯新貴雲迪碧克，強陣出擊，相反，波蘭王牌兼隊長羅拔利雲度夫斯基啱啱踢完歐聯獲免役，火力大減，加上近年碰頭畀「橙衣兵團」食住，讓球主勝捧得過。

　　荷蘭上屆歐國聯表現突出，唔單只喺A1分組賽力壓法國及德國，並於4強擊退英格蘭，可惜決賽輸畀葡萄牙屈居亞軍，雖敗猶榮。主帥朗奴高文上月突然解約轉教巴塞隆拿，依家由助教洛迪維治斯暫掌帥印，好彩朗奴高文近兩年重組荷蘭成功，華基爾雲迪積克、韋拿杜姆及迪比已成為3線骨乾，同時有新星法蘭基迪莊及剛轉投英超曼聯嘅雲迪碧克上曬位，就算唔係踢得好似傳統咁華麗，亦做到攻守兼備。

　　利雲度夫斯基掛免戰牌
　　另一邊廂，波蘭喺上屆歐國聯A3分組賽未贏過，最終包尾收場，演出差強人意，呢支東歐球隊一向靠羅拔利雲度夫斯基單天保至尊，但「羅拔仔」因為上月先隨拜仁慕尼黑踢完歐聯，今輪國際賽期獲准免役，呢名隊長除咗射術了得之外，亦擅於為隊友鋪橋搭路，冇咗佢對波蘭進攻影響甚大。睇番雙方近3次交鋒，荷蘭全部贏曬，擺明格食格，必定力爭打響頭炮，為下場出戰強敵意大利造勢，讓球主勝有買趁早。