强强对撼唔想先失威
　　第2届欧国联今晚揭开战幔，A4上演超级大战，德国主场火併西班牙打头阵。德国今次未有徵召两大门神纽亚及达史特根，为巩固防线唔敢冒进；西班牙锋线出现多位新丁，默契欠奉，加上近年碰头例少交收，首战必求稳阵，唔慌多波入，2.5球细盘值捧。

　　由于拜仁喺上月中先勇夺欧联，德国主帅勒夫相当识做，今次畀大部分拜仁球员休战，包括队长纽亚，拜仁阵中只得历卡斯苏尼及利莱辛尼入选。而同纽亚竞争激烈嘅2号门神达史特根，亦因伤要做手术挂免战牌，阿仙奴门将宾特尼奴有机会担正，不过佢都只係好番冇耐，状态一般，勒夫亦坚持唔用老将中坚晓姆斯，为免防守错漏百出，预计会起用3中坚阵式，配合瞻前顾后嘅两闸泰路基拿及鲁宾高辛斯，防守时随时变成5人防线，稳阵行先。

　　斗牛多新兵欠默契
　　另一边厢，「斗牛兵团」西班牙主帅安历基今次亦召入大量新人，不过狼队快翼艾达马查奥尔，日前因确诊新冠肺炎无奈退队，皇马翼锋马高阿辛斯奥寻日亦因伤退出，而且除艾利加西亚、利古朗、米基尔马连奴外，前线新丁仲有费伦托利斯及巴塞17岁神童安素法迪，但连同洛迪高摩连奴及谢拉特摩兰奴，呢条锋线近乎未夹过咁滞，未必即刻有化学作用。

　　翻查纪录，两支欧洲劲旅近4次交手，夹埋只係入得5粒咁大把，全开2球或以下，今仗分组赛头炮，大家都唔想先失威，睇怕都係少交收，2.5球嘅入球细咪走鸡。