周二凌晨上演兩場瑞典超賽事，重頭戲由聯賽榜4哥諾高平主場斗排第6嘅赫根。諾高平上場贏波終止5場不勝頹勢，射手基斯杜化尼曼亦重拾射門鞋；赫根對上5次聯賽作客諾高平全部輸曬，再訪凶地冇運行，主隊小讓平半要上盤。

　　諾高平今季走勢「先甜後苦」，頭8輪聯賽6勝2和，一度進佔榜首位置，可惜球隊板櫈深度唔夠，連場征戰後球員開始呈現疲態，早排陷入5仗不勝困局，好在上場作客弱旅哥登堡，憑艾姆基斯、夏沙班奴域及基斯杜化尼曼入波，成功反彈贏3比1，近6場聯賽首次贏波。首席射手基斯杜化尼曼取得個人今季第8個聯賽入球，信心返曬嚟，今晚返主場定必乘勝追擊。

　　赫根作客打折扣

　　赫根今季頭6場聯賽作客2和4負，直至上場作客新昇班嘅華堡，先以3比1取得今季聯賽作客首場勝仗，證明佢哋一旦離開主場，戰斗力就會大打折扣。赫根早前從屈福特借得門將達爾堡，今仗或會正選上陣，但佢哋近5仗聯賽場場有失波，短時間內難望有改善，加上對上5次聯賽作客諾高平全部輸曬，往績睇見都唔開胃，諾高平讓平半橕上盤。