2020/08/16

　　今晚歐霸4強大戰，西維爾喺德國科隆火併曼聯。兩軍實力相差無幾，一場過淘汰賽都唔想先失守陷入苦戰。西維爾今屆10場歐霸上半場均保持清白之身，單計近6場就有5次開半場和，防守紀律極佳，半和值得再追。

　　連同前身歐洲足協盃，西維爾曾5次喺歐霸封王，係歷來捧盃次數最多嘅球隊。呢支西甲4哥復賽後，各項賽事踢咗13場不敗，當中9場冇失波，包括歐霸16強2比0擊敗羅馬，8強再以1球小勝狼隊，表現穩中求勝。除此之外，西維爾今屆10場歐霸從未試過半場落後，呢10場上半場都冇失過波，面對奪標大熱門曼聯，相信會沿用呢套穩守戰術。

　　雙方踢歐霸勁穩陣

　　曼聯上圈8強面對牌面較弱嘅哥本哈根，都要苦戰至加時先憑1球12碼險勝晉級，前線就算有拉舒福特、安東尼馬迪爾及格連活特嘅進攻三叉戟，嚟到一場過淘汰賽場合，都唔敢過分急攻。查實「紅魔」今屆出戰歐霸大部分時間都先做好防守，近6場歐霸有4次開出半場和，而且由分組賽起計，至今11場歐霸賽事，得1次換邊前有失波，穩陣程度唔輸畀西維爾。既然兩軍踢法、近況皆難分高下，今場宜再追半場和。