周三晚上英超亞洲挑戰盃喺南京開打，其中上季英超盟主曼城將會面對「錘仔幫」韋斯咸。曼城呢次雖然冇咗阿古路，不過以史達寧為首嘅一班球星質素依然超班，加上領隊哥迪奧拿講到明唔會揸流攤，呢場食硬「私房菜」韋斯咸。

　　曼城2013年曾喺香港大球場捧起過英超亞洲挑戰盃，相信唔少香港球迷都依然記憶猶新，呢次阿古路、加比爾捷西斯、費蘭甸奴同艾達臣摩拉斯都因為早前出戰美洲盃而獲免戰牌，另外馬列斯仲踢緊非國盃未歸隊，不過唔好以為比賽會因此星味大減。皆因曼城官方已經證實基爾獲加、奇雲迪布尼、大衛施華同貝拿度施華等巨星依然會隨隊出征之馀，新加盟嘅洛迪卡斯簡迪都有機會首次為「藍月亮」上陣，球隊整體水准依然強勁。為延續上季勇態，領隊哥迪奧拿就直言季前熱身賽都唔可以鬆懈，可見「藍月亮」呢場絕對係志在必得。相反韋斯咸主力前鋒阿拿奧杜域啱啱離隊加盟中超球隊上海SP，而耶莫蘭高又重傷初愈狀態難有保證，齋靠「小豆」查維亞靴南迪斯嘅韋斯咸好難發圍，況且兩隊近7次交手曼城贏曬，呢場「藍月亮」好大機會繼續食住「錘仔幫」。