女子世界盃16強，西班牙女足挑戰上屆冠軍美國女足。美國女足分組賽表現充滿霸氣，3戰全勝入18球0失球，不過作為衞冕球隊，最重要是懂得留放，美國女足大賽經驗豐富，上屆去到淘汰賽之後，4場比賽有3場總入球2球或以下，目標為本，今場亦可能收夠籌就算，寧捧入球細。

　　美國女足入咗18球，打破世盃分組賽最高入球紀錄，星級球員雅歷絲摩根首戰入5粒，不過其後兩場分組賽就冇波入，仲喺最後一場對瑞典時受傷，下半場踢咗1分鍾就被迫要換走，開頭未知係咪觸傷右膝舊患。佢喺賽後立即Call曬班隨團記者，表示自己冇事，領隊艾莉絲亦派心丸，話咁做係為咗今場雅歷絲摩根可以上陣，先至咁謹慎。

　　其實艾莉絲咁做，唔多唔少亦反映出，美國女足嚟緊將會目標為本，只要贏波就得，唔會要球員冒險，睇番上屆佢哋淘汰賽，除咗決賽冇曬後顧之懮大炒日本5比2，之前3場由16強至准決賽，都係贏對方一粒起兩粒止。今屆其實情況好相同，首戰大炒泰國13比0後，跟住係贏智利3比0同2比0擊敗瑞典，愈贏愈少，始終短時間要應付咁多場波，如果佢哋以冠軍為目標，就一定唔會咁快放到咁盡。

　　西班牙女足分組賽1勝1和1負，有2場入唔到波，進攻能力肯定不及美國女足，相信今場都唔會與美國女足斗攻，只會做好防守，減少失球，希望可以有奇跡出現，所以今場應該唔會太多波入。