周三凌晨U21歐國盃分組賽，C組有英格蘭U21同法國U21上演明日之星大曬冷。三獅軍團人才輩出，陣中多位小將喺英超表現出色，質素有保證；另邊廂法國今屆遣強陣，實力亦唔輸蝕，兩軍血氣方剛為打響頭炮唔會有保留，入球大必捧。

　　科頓踢曼城見慣大場面

　　英格蘭各青年梯隊近年國際大賽表現優異，今屆出戰U21歐國盃嘅大軍中，幾乎將呢班「天才少年」全部徵召入伍，其中卡維特利雲同蘇蘭基就係帶領英軍捧起2017年U20世青盃嘅功臣，至於賴恩施斯隆同美臣蒙，同年就跟另一支「英軍幼獅」成功問鼎U19歐國盃冠軍，不過當中最受矚目嘅肯定係菲爾科頓同佔士麥迪臣！

　　先講菲爾科頓，呢位進攻中場目前效力曼城，雖然球隊巨星如雲，但喺領隊哥迪奧拿悉心調教下，喺剛過去嘅球季都有唔少上陣機會，甚至連歐聯都有得踢，可謂見慣大場面。至於佔士麥迪臣仲叻仔，過去一季已經成為李斯特城嘅中場核心，比起同齡球員明顯高一班，有呢班「天才」壓陣，英格蘭絕對有本錢大打進攻足球。

　　英軍有「天才」，法國方面一樣唔嘢小，除咗擁有「名將之後」馬古斯杜林，隊長盧卡斯杜沙特早於2016年已經帶領「小高盧雞」喺U19歐國盃封王，另外前鋒穆沙迪比利亦喺法甲里昂長居正選，過去一季更攻入15球，夠曬料同英軍駁火！況且英格蘭近5場U21歐國盃決賽周賽事，有4次開3球或以上，估計今場入波唔會少，一於吼實入球大。