周二早上美洲盃只有安排咗一場C組賽事，以嘉賓身份參戰嘅日本，挑戰衞冕球隊智利。智利於分組賽表現慢熱，初段常與對手僵持不下，日本除超新星久保建英外，還有不少勐將壓陣，有力於換邊前抵擋智利攻勢，半場和值博。

　　智利A山維達爾狀態低迷

　　智利繼連續2屆捧起美洲盃後，再於2017洲際盃取得亞軍。今屆能否延續強勢於美洲盃取得3連霸，阿歷斯山齊士同維達爾嘅表現最為關鍵。可惜A山今季喺曼聯表現低迷，又傷又成日後備，維達爾自從由拜仁轉投巴塞後，亦都失去正選，加上另一射手奧利蘭拿因傷落選，進一步削弱智利鋒力。

　　日本今次出戰美洲盃擺明以老帶新，希望為明年東京奧運爭金牌練兵，當所有人將目光聚焦喺久保建英身上，21歲前鋒前田大然反而成為秘密武器。

　　呢位松本山雅前鋒，被視為東京奧運世代No.1攻擊手，佢嘅拿手好戲係加速力強，50米手動計時只需5.8秒，比起上季效力德甲漢諾威嘅淺野拓磨（5.9秒）仲要快，係日本傳媒眼中嘅「重寶」，期待佢同岡崎慎司，能夠產生爆炸性嘅化學反應。與此同時，主帥森保一亦召入柴崎岳及中島翔哉兩名經驗中場，柴崎更揚言希望以經驗助一班「奧運腳」成長。況且，智利出戰美洲盃分組賽入局較慢，近9場分組賽6次開半場和，捧半場和明智。