美洲盃B組首輪賽事，巴拉圭惡斗亞洲代表卡塔爾。巴拉圭近年青黃不接問題嚴重，導致喺大賽常常甩轆，獲邀參賽兼應屆亞洲盃盟主卡塔爾，趁巴拉圭初段陣腳未穩隨時偷到雞，不妨冷敲半場客勝。

　　昔日南美勁旅青黃不接

　　一向係南美勁旅嘅巴拉圭，近年表現每況愈下，唔止上屆美洲盃喺分組賽出局，更連續2屆無緣世盃決賽周，主因係青黃不接，近年較為標青嘅新星，只得效力紐卡素嘅中場米基爾阿米朗，今屆仲要召入奧斯卡卡度素、靴蘭佩雷斯等老將，可見球隊人才凋零。齋講近況，巴拉圭近8仗僅1勝，其中5仗更落敗，曳到冇朋友。

　　身為來屆世盃決賽周主辦國，卡塔爾今次以嘉賓身份首次參加美洲盃，難得喺具競爭性盃賽面對南美洲球隊，正好檢視一下自己嘅實力。卡塔爾喺年頭亞洲盃7戰贏曬封王，包括決賽擊敗勁旅日本，信心爆棚，日前搵巴西「拍跳」都係僅輸2粒唔失禮，絕對唔怕今非昔比嘅巴拉圭。

　　翻查紀錄，巴拉圭近6場美洲盃有4次喺上半場落後，不妨博卡塔爾半場客勝。