在法國舉行的女子世界盃，今晚頭場上演D組首輪賽事，阿根廷女足火併上屆亞軍日本女足。「大和撫子」連續兩屆世盃殺入決賽，實力絕對唔講得笑，撞正冇骨魚腩「阿女」，有力大勝打響頭炮，直取讓球客勝。

　　日本女足在一代王牌澤穗希帶領下，前屆女子世盃歷史性封後，上屆亦殺入決賽，最終不敵勁旅美國女足，屈居亞軍，連續兩屆打到最後階段，可見佢哋嘅實力強橫。儘管老將澤穗希已經退役，但「粉紅兵團」一向靠打整體戰，經驗豐富嘅熊谷紗希、鮫島彩及宇津木瑠美仍在陣中，隊長熊谷紗希更係法國里昂女足剛屆稱霸歐聯嘅一員，前鋒岩渕真奈及橫山久美埋門把握力亦唔曳，演出令人期待。

　　阿根廷女足係冇骨魚腩

　　相反，阿根廷女足雖有利雲特女足隊長芭妮莉領軍，可惜整體質素弱過藥煲，出征世盃前3場「拍跳」輸畀澳洲、新西蘭同南韓女足，見到都唔開胃。何況「阿女」對上2次征戰世盃決賽周，唔單止6場分組賽輸曬，有5仗更淨輸3球或以上，正宗冇骨魚腩，今仗都係等劏格局，就算讓球主客和日本女足要讓2球亦冇有怕，照捧讓球客勝。