周四凌晨歐國聯4強大戰，葡萄牙主場迎戰瑞士。葡萄牙頭號球星基斯坦奴朗拿度（C朗）缺席4場歐國聯分組賽之後，呢場強勢回歸，葡萄牙前場實力即刻高幾班，加上對手瑞士都有唔少攻擊好手壓陣，兩軍絕對有本錢大打對攻戰，一於橕中位數2.5球大盤。

　　首屆歐國聯經歷多場激戰之後嚟到最後4強階段，有主場之利嘅葡萄牙肯定希望可以喺自家球迷面前捧番個盃，當中C朗作為球隊領軍人物，求勝心不嬲超乎常人，一定唔會放過呢次奪冠機會，2004年葡萄牙喺自己地頭舉行嘅歐國盃一路殺入決賽，可惜最終不敵希臘無緣冠軍，當年仲係一臉青澀嘅C朗賽後哭成淚人，成為葡萄牙球迷不能忘懷嘅一幕。如今C朗唔止成為葡萄牙老大哥，仲由初出道時只識一味死扭爛扭嘅獨食仔，成長為世界級入球機器，今季佢首次踢意甲以21個聯賽入球成為祖雲達斯頭號射手，腳風奇順，呢場有喺曼城表現大熟大勇嘅貝拿度施華，同有望首次為國家隊上陣嘅超新星祖奧菲歷斯提供側擊支援，葡萄牙火力絕對不容忽視。

　　瑞士火力勐大盤保證

　　瑞士喺A2組末輪同比利時嘅大戰中，先落後2球嘅情況下連追5球，最終5比2反勝對手搶得4強資格，盡顯球隊超強前場火力，比賽中大演帽子戲法嘅賓菲加前鋒施費洛域，今季喺葡超狂轟23球勇奪聯賽神射手獎，呢場返到葡萄牙作賽對佢嚟講肯定唔會陌生，隨時有機會再發圍。查實瑞士今屆歐國聯分組賽幾乎場場都大打進攻足球，4場全開3球或以上，呢場隨時照辦煮碗，中位數2.5球入球大好路。