周三凌晨世青盃分組賽，F組葡萄牙U20硬撼阿根廷U20。葡萄牙今屆陣容人才濟濟，小組首戰亦成功擊敗南韓，呢場面對後防唔算穩陣嘅阿根廷，一班攻擊好手隨時再有機會發圍，平手盤捧葡萄牙U20。

　　葡萄牙U20今屆以賓菲加、波圖和士砵亭等國內豪門嘅年青球員為骨乾，雖然最為人熟悉嘅「新Ｃ朗」祖奧菲歷斯，已經被提拔做大國腳無緣今屆賽事，不過佢啲隊友來頭絕對唔嘢少。其中謝特臣費南迪斯今屆喺賓菲加上位擔正，帶領球隊聯賽封王兼喺歐霸盃殺入8強，絕對係葡萄牙U20中場核心，加上分別效力狼隊同曼聯嘅維拿基同達洛治都已經喺英超嶄露頭角，整體質素有保證。相反千禧年前後多次稱霸世青盃嘅阿根廷，近幾屆世青盃表現明顯下滑，首戰面對弱旅南非U20雖然大勝而回，不過後防風聲鶴唳唔算穩陣，先後2次遭對手偷襲得手，呢場面對超班嘅葡萄牙U20隨時陷入苦戰，平手盤寧願捧葡萄牙U20好過。